Ү.ж. 7 қазанда Улан-Батыр қаласында Президент Н.Ә.Назарбаевтың ҚР Парламентінің ІІ-сессиясының ашылуында сөйлеген сөзіне арналған «Дөңгелек үстел» өтті
Қазақстанның Моңғолиядағы Дипломатиялық өкілдігі ү.ж. 7 қазанда Улан-Батыр қаласында осы елдің ресми адамдары, саясаттанушылары, ғалымдары мен қоғам қайраткерлері және жетекші БАҚ өкілдерінің қатысуымен Президент Н.Ә.Назарбаевтың ҚР Парламентінің ІІ-сессиясының ашылуында «Қазақстан жолы: Тұрақтылық, жаңару және өркендеу» сөзіне арналған «Дөңгелек үстел» өткізді.
«Дөңгелек үстелдің» басталуы алдында қатысушылар бүгінгі Қазақстан туралы деректі фильмді тамашалады. Моңғолиядағы Қазақстан Республикасының Уақытша Сенімді Өкілі (УСӨ) Асхат Сыздықов қатысушыларды Елбасы сөйлеген сөзінің негізгі мазмұнымен, елде жүргізіліп жатқан саяси, әлеуметтік-экономикалық реформалар, Қазақстанның сыртқы саясатының негізгі бағыттары туралы хабардар етті.
Өз кезегінде «Дөңгелек үстелге» қатысушылар сөз алып ой-пікірлерін білдірумен бірге көптеген сұрақтарына егжей-тегжейлі жауап алды.
Моңғолия Мемлекет Университеті журналистика бөлімінің меңгерушісі, профессор М.Зүлкәпіл Қазақстанның әлем деңгейінде беделі жоғарылап, дүниежүзі елдерінің назарын өзіне тартып отырғанына тоқталып, Моңғол елі де қазақстандық даму үлгісінің кейбір тұстарын өзіне алуына болатынын атап өтті.
Моңғолия Ғылым академиясының философия, социология және құқық институты директорының орынбасары, доктор А.Жамбыл Қазақстанда алдымен экономика сосын саясат принципінің жемісті іске асқанын тілге тиек етіп, көптеген елдерде керісінше, саясат бірінші орынға қойылғандықтан экономика кешеуілдеп қалғанына назар аударды. Бұл орайда Қазақстанның тәжірибесінен үлгі аларлық мәселе аса мол дегенді білдірді.
Қатысушыларға көрсетілген деректі фильмнің әсері мол болды. Олар Астана қаласының ерекше құрылысымен танысып, елдегі оң өзгерістерді көзімен көрген соң Моңғолияның бұл арада үйренері көп деген пікірлерін ортаға салды.
Кездесудің қорытындылаған А.Сыздықов аталған іс-шара Қазақстанның Ата заңының және Парламентінің 10 жылдық мерейтойына арналып өткізілгенін айтып өтті.
Жарияланған күні: 2005-10-14
|
 |
