Үстіміздегі жылғы 15 желтоқсанда Лондон қаласында 2009-2011 жж. «Еуропаға жол» мемлекеттік бағдарламасын іске асыру мәселелеріне арналған дөңгелек үстел өтті.
Іс-шара барысында ҚР Сыртқы істер министрінің орынбасары Қайрат Сарыбай, ҚР-ның Ұлыбританиядағы Елшісі Қайрат Әбусейітов және Вена университеті Саяси ғылымдар институтының профессоры Пол Гайс сөз сөйледі.
Баяндамалар мен бағдарламаны талқылау кезінде Қазақстанның ЕҚЫҰ-да төрағалық етуі, транспорт, технологиялармен алмасу, ауыл шаруашылық, энергетика, кіші және орта бизнесті қолдау салаларында еуропалық елдермен ынтымақтастықты белсендіру сияқты тақырыптарға басты назар аударылды.
Қатысушылардың ЕО-ның негізгі елдерімен стратегиялық әріптестіктің деңгейіне шығу, Қазақстандағы қазіргі саяси және экономикалық реформалар динамикасының мәселелері және олардың Еуропамен байланыстарды күшейтуге көрсететін әсеріне қатысты ұсыныстар назарын тартты. Ауғанстанды қайта құру үрдісінде ЕҚЫҰ-да қазақстандық төрағалықтың атқаратын рөлі жан-жақты қарастырылды.
Аталған күні британ Форин Офисі басшысының орынбасары, Ресей, Солтүстік Кавказ және Орталық Азия басқармасының директоры М.Дэйвенпортпен кездесу өткізілген болатын. Кездесуде «Еуропаға жол» бағдарламасын іске асырудағы практикалық аспектілер, ҚР-дың ЕҚЫҰ-да төрағалық етуге дайындалу шеңберінде екі елдің өзара ықпалдастық перспективаларын қоса, екіжақты қатынастардың барлық жиынтығы талқыланды.
Сол күнгі кеште Лондонның атақты залдарының бірі – Кадоган-холлда Корольдік филармониялық оркестрді басқарған М.Стравинский, Қайыржан Жолдыбаев, Элеонора Бекованың қатысуымен Қазақстан тәуелсіздігінің 17 жылдығына арналған классикалық музыка концерті өтті.
Жариялаған күні: 2008-12-15
