ЖАҢАЛЫҚТАР

Ү.ж. 16 желтоқсанда Бейрут қаласында Тәуелсіздік Күніне  орай ресми қабылдау өткізілді

Үстіміздегі жылғы 16 желтоқсанда Бейрут қаласында Қазақстан Республикасының Дипломатиялық өкілдігі Қазақстанның Тәуелсіздік Күніне  орай ресми қабылдау өткізді.

Қазақстан Республикасы Тәуелсіздігінің 17-жылдығын тойлауға Ливан Республикасының Сыртқы істер министрі Фаузи Саллух, Парламент Төрағасының өкілі депутат Касем Хашим, Премьер-Министрдің өкілі, Мемлекеттік министр Халед Қаббани, Ливанның мемлекеттік органдары мен қоғамдық ұйымдарының өкілдері, Бейрутте тіркелген дипломатиялық өкілдіктердің, консулдық мекемелердің басшылары, бизнесмендер және БАҚ өкілдері қатысты.

Қазақстан Дипломатиялық өкілдігінің басшысы Ержан Қалекенов өз сөзінде еліміздің тәуелсіздік жылдары ішінде саяси және әлеуметтік-экономикалық салалардағы жетістіктері жөнінде баяндап беріп, қазақстан-ливан қарым-қатынастарының қазіргі жағдайы мен алдағы уақыттағы даму перспективаларымен таныстырды.

Ливан Сыртқы істер министрі Фаузи Саллух Қазақстанның Тәуелсіздік күнімен құттықтай отырып, елімізге зор бақыт, құт-береке және бейбітшілік тіледі.

Қабылдау кезінде қонақтарға Қазақстан туралы фотокөрме ұсынылып, араб тілінде басылған «Жаңа Қазақстан жаңа әлемде» атты кітап таратылды.

Жариялаған күні: 2008-12-16