ЖАҢАЛЫҚТАР
Ү.ж. 16 желтоқсанда Дели қаласында Қазақстан Республикасының Ұлттық күніне орай ресми қабылдау өтті
Үстіміздегі жылғы 16 желтоқсанда Дели қаласында Қазақстан Республикасының Ұлттық мерекесі – Тәуелсіздік күніне орай ресми қабылдау өтті. Ресми, әскери шеңберлері мен үнді қоғамының өкілдерінен құралған 400-ден астам Қазақстанның қонақ-достары еліміздің халқын осы бір жарқын ұлттық мейрамымызбен құттықтауға келді.
Тәуелсіздік күнін мерекелеуде Үндістанның сыртқы істер мемлекеттік министрі Е.Ахамед Құрметті қонақ болды. Үнді дипломаты Елші Қ.Омаровты және жиналғандарды Республика тәуелсіздігінің 17-жылдығымен құттықтады. Елімізде осы жылғы сәуірде Вице-Президент Хамид Ансаридің ресми делегациясы мүшесі ретінде болған Е.Ахамед Қазақстанның тәуелсіздік жылдары қол жеткізген табыстары жөнінде оң лебіз білдіре отырып, Үндістанның ҚР Президенті Н.Ә.Назарбаевтың халықаралық бастамаларын жоғары бағалайтындығын және қолдайтындығын ерекше атап көрсетті.
Президент Н.Ә.Назарбаевтың Үндістанға жасайтын мемлекеттік сапары қарсаңында үнді тарапының өкілдері Қазақстанның қазіргі әлемдегі рөлінің артып отырғандығын, ашық және гүлденген қоғам құру жолындағы еліміздің едәуір ілгерілегендігін, Қазақстанның экономикалық, әлеуметтік және демократиялық дамуын жоғары бағалады. Қонақтар екіжақты ынтымақтастық ірі әлеуетін атай отырып, оны стратегиялық серіктестік дәрежесіне дейін көтеру қажеттігін алға тартты, өйткені Қазақстан Үндістан үшін ең сенімді саяси және экономикалық серіктерінің бірі болып табылады.
Қабылдауда қазақ әуенінің сүйемелдеуімен заманауи Қазақстан мен оның әрұлтты халқының өмірі жөніндегі слайдтық шоу көрсетілді.
Таратылған материал ретінде Елшілік дайындаған «Қазақстан: әртүрліліктегі бірлік» және «Ортақ әлем: әралуандық арқылы өркендеу» атты журналдары үнді қауымдастығының ерекше қызығушылығын туғызды. Журналдар Елбасының халықаралық бастамаларымен, 2008 жылы өткен шаралармен, Астананың дамуымен, Қазақстан-Үндістан қатынастарының жағдайы мен перспективаларымен, сондай-ақ көпұлтты қоғамын нығайту жөніндегі еліміздің бірден бір тәжірибесімен таныстырады.
Жариялаған күні: 2008-12-16
