ЖАҢАЛЫҚТАР

Ү.ж. 4 желтоқсанда Осака қаласында Қазақстан Республикасының Жапонияның Кансай аймағындағы Құрметті консулдығын ресми түрде ашылды

Ү.ж. 4 желтоқсанда Осака қаласында ҚР Елші Ақылбек Камалдинов Қазақстан Республикасының Жапонияның Кансай аймағындағы Құрметті консулдығын ресми түрде ашты.

Құрметті Консул лауазымына әлемге әйгілі «Тошиба» корпорациясының Вице-Президенті Широ Кавашита тағайындалды.

Жапонияның ең дамыған аймақтарының бірінің орталығы болып табылатын Осака қаласындағы ҚР Құрметті Консулдығының салтанатты тұсау кесер рәсіміне жергілікті ресми тұлғалар мен ірі және орта бизнес басшылары, мемлекеттік мекемелердің арнайы өкілдері мен беделді БАҚ өкілдері қатысты.

Рәсім аясында ұйымдастырылған арнайы баспасөз конференциясында Елші жиналған қауымға Республикамыздың саяси-экономикалық, әлеуметтік даму деңгейі мен көпұлтты мемлекетіміздегі бейбітшілік пен татулық саясаты жайында айтып, Қазақстанның қазіргі таңдағы халықаралық сахнадағы бастамалары туралы, атап айтқанда 2010 жылы Еуропадағы Қауіпсіздік және Ынтымақтастық Ұйымына төрағалық ететініміз жайында айрықша назар бөлді.

Шара барысында Қазақстанның инвестициялық климатын, туристік мүмкіншіліктерін, жалпы экономикалық дамуын айқындайтын арнайы  ақпаратты қамтыған материалдар кеңінен таратылып, арнайы фотокөрме ұйымдастырылды.      

Құрметті Консулдықтың басты міндеттері болып Қазақстан мен Жапонияның сауда-экономикалық және мәдени-гуманитарлық салалардағы ынтымақтастық қарым-қатынастарын нығайтумен қатар, Қазақстанның әлеуметтік-экономикалық жетістіктері мен жан-жақты даму ахуалын, сонымен қатар мемлекетіміздің халықаралық сахнадағы бастамаларын күншығыс еліне тереңірек таныстыру болып отыр.     

Жарияланған күні: 2009-12-04