ЖАҢАЛЫҚТАР

Егемен Қазақстан: «Тікелей желі: Республикалық органдардың жауаптары

отандық дипломатия ұлттық мүдделерді қорғау қызметінде»

«Егемен Қазақстан» Республикалық газеті» №416-418 (25815) 12 желтоқсан 2009 жыл

            Мемлекет басшысы Нұрсұлтан Әбішұлы Назарбаев өткізген тікелей желі кезінде Сыртқы істер министрлігіне қатысты 300-ден астам сұрақ келіп түсті.

            Сауалдар еліміздің сыртқы саясатының негізгі бағыттары, Еуропадағы Қауіпсіздік пен ынтымақтастық ұйымына төрағалықтың мән-маңызы, көршілес мемлекеттермен қарым-қатынастар сияқты бағыттарды қамтиды. Бүгін осы сауалдар бойынша Қазақстан Республикасының Мемлекеттік хатшысы – Сыртқы істер министрі Қанат САУДАБАЕВ жауап береді.

            Сұрақ: Мен Қазақстанның өндірісті орталықтарының бірі – Қарағанды қала­сының тұрғынымын. Елбасымыз оқыған ҚарМТУ-дың екінші курсында оқимын. Мен әрбір қазақстандық сияқты өзімнің ішімдегі сұрағымды қояйын дегенмін. Сіз Қазақ­станның ЕҚЫҰ-ға төрағалық етуі бұл Еу­ропаға ашылған есік дедіңіз. Менің сұрағым, аталмыш шара бізге қандай басымдылық және нәтиже әкеледі? Алдын ала Сізге алғысымды білдіргім келеді! (Әуелбеков Алмас Ғалымұлы).

            Жауап: Қымбатты Алмас, Елбасына осындай мағыналы сауал қойғаның үшін саған рахмет. Тиянақты жауап беруге тырысайын.

Қазақстанның осы халықаралық ұйымға қатысуы біздің ұлттық қауіпсіздігімізді нығайтуға септігін тигізеді. Жалпы дәл осы міндет, ұйымның өз атауынан көрініп тұрғандай, қызметінің негізгі мәні болып табылады.

Өзіңе мәлім болғандай, аталмыш ұйым оған қатысушы елдердің қауіпсіздігі мә­селесімен әскери-саяси, экономика-эко­ло­гиялық және гуманитарлық секілді үш өл­шемде іс-қимыл атқару арқылы айналысады. Оның басқа бірлестіктерден негізгі айыр­машылығы – қауіпсіздік мәселелерін жан-жақты қамтитын тәсілді пайдалануында.

            Сонымен қатар ЕҚЫҰ – біртұтас құндылықтарды дәріптейтін мемлекеттер қауымдастығы болып табылады. Қазақстан осы қағидаттарға толықтай ортақтасатынын және басқа мемлекеттермен әрі өз азаматтарымен қарым-қатынастарды дәл соларға негіздеп жүргізуге ниетті екенін талай рет мәлімдеген болатын.

            ЕҚЫҰ-ға төрағалық ету туралы идея Қазақстанға аталмыш шараның басталуынан бұрын-ақ қомақты пайдасын әкеліп үлгергенін айтып өткен жөн. Қазірдің өзінде елімізде экономиканың нарықтық негіздері нығая, халықтың саяси белсенділігінің арта, қоғамдағы құқықтық мәдениет жандана түскенін атап өткен абзал. Көп ретте мұндай жағдай ЕҚЫҰ-ға төраға бола алатын мемлекеттерге қойылатын бейресми талап­тарға сай болу үшін қосымша шаралардың арқасында мүмкін болды. Оң өзгерістер өз жалғасын табуда және экономика тұрғы­сынан күшті, демократиясы нығайған мем­лекет құру жолында Қазақстан дамуының негізгі бағытымен үндеседі.

            ЕҚЫҰ-ға төрағалық ету міндеті ел дамуының ұзақмерзімдік басымдықтарын күшейтеді және толықтырады. Төраға қызметтерін атқару Қазақстан қоғамының жалпыеуропалық өмір стандарттарына жақындауына зор серпін береді.

            ЕҚЫҰ Қазақстанның толық мүшесі мәртебесі бар іс жүзіндегі бірден-бір еуро­палық ұйым болып табылатындығы және бұл жағдай бір мезгілде еуро-атлантикалық және еуразиялық қауіпсіздікті қамтамасыз ету үдерістеріне араласуға керемет мүмкіндік беретіндігінің маңызы зор.

Төраға қызметінде біз Ұйымның “орта­лықазиялық бағытын” күшейткіміз келеді. Себебі “Кәрі құрлыққа” да, өзіміз орна­ласқан аймаққа да халықаралық терроризм, діни экстремизм, есірткі тасымалы сияқты бірқатар жаңа қауіп-қатерлерге қарсы күресу ЕҚЫҰ-ға қатысушы барлық елдердің мүдделеріне сай келеді.

            Сондай-ақ ЕҚЫҰ қызметіндегі кейбір олқылықтарды түзеу, гуманитарлық өлшемнің рөлі мен мәнін ешбір кемсітусіз, әскери-саяси және экономика-экологиялық өлшемдердің нақты мазмұнын толықтыру төрағалығымыздың нақты міндеттерінің бірі болады.

Қазақстан үшін еуразиялық көліктік дәліздерді дамыту басым мәселелердің бірі болып табылады.     Сондықтан ЕҚЫҰ-ның “қазақстандық жыл” шеңберінде өтетін 18-ші Экономикалық-экологиялық форумының тақырыбы ретінде “ЕҚЫҰ аймағында шекаралардың қиылысу пункттеріндегі тиісті басқаруды жетілдіру, жер үсті көлігінің қауіпсіздігін арттыру мен халықаралық авто­мобиль және темір жол көлігі қатынастарын жеңілдету” болып таңдалды. Біз Астанада (ү.ж. 12-13 қазанында) Форумға бірінші дай­ындық конференциясын өткіздік. Форум­ның қалған үш бөлігі келер жылғы қыста және көктемде еуропалық астаналарда өтеді.

            Біз сондай-ақ ЕҚЫҰ-ның әлеуетін қоршаған ортаны қорғау саласында пайда­лануды ерекше маңызды деп санаймыз. Осыған байланысты қазақстандық тарап қазіргі уақытта төрағалықтың экологиялық бағытындағы басымдығы ретінде Арал алқабы үлгісінде аймақтық қауіпсіздікті нығайту шараларында мониторинг пен экологиялық қатерлерді алдын ала әрекет ету тетіктерін құру туралы мәселелерді ілгерілету мүмкіндігін қарастыруда.

            Толеранттылық және мәдениетаралық үнқатысуды ілгерілету болашақ төрағалық­тың гуманитарлық өлшемінің негізгі басымдығы ретінде ЕҚЫҰ-ның ағымдағы күн тәртібінде шешуші мәселелердің бірі болып табылады. 130-ға жуық ұлт өкілдері бейбіт өмір сүріп жатқан Қазақстанның этносаралық және дінаралық келісімді сақтау ісінде бірегей тәжірибесі бар екені рас.         Білуімізше, бұл – қауіпсіздіктің гуманитарлық өлшемінің, адам құқықтары мен дамыған демократияның негізі. “Демократиясы дамыған” елдердің өзінде кейде орын алып тұратын дінаралық және нәсіларалық негіздегі қақтығыстар қазір осы тақырыптың қаншама өзекті екендігін көрсетеді.

            Сұрақ: Ресейлік ақпарат құралдары Беларусь Республикасының Парламенті 2 аптадан кейін Грузия мемлекетінің құрамында болған Абхазия және Солтүстік Осетияның егемендігін таниды деп хабар беріп жатыр. Одан кейін Қазақстан да таниды деген сөз, сыбыс бар. Сол рас па? (Қондыбай).

            Жауап: Оңтүстік Осетияда және жалпы Кавказда соңғы жылдар ішінде орын алған оқиғалар әділ және ұстамды бағалауды талап етеді, өйткені олар қағидатты сипаты бар бірқатар мәселелерді қозғайды. Оңтүстік Осетияда күрделі шиеленіскен этносаралық кикілжіңді күшпен шешуге әрекеттену ауыр салдарларға әкеліп соқты. Болашақта этно-аймақтық мәселелерді шешу жалпы адамзат таныған халықаралық құқықтық базаға сүйенуі тиіс екені белгілі болды. Біз осы мәселені БҰҰ Жарғысына, 1975 жылғы Хельсинки Қорытынды Актісіне, 1966 жылғы адам құқықтарына қатысты халықаралық пактілерге және халықаралық құқықтың басқа да негізге алынатын құжаттарына сәйкес шешудің Ресей басшылығы ұсынған жолын құптаймыз.

            Сұрақ: 2010 жылы еліміздің ЕҚЫҰ-ға төрағалығы әлемдегі ядролық қару­ларды қысқартуға ықпал ете ала ма? (Амангелді Қаңтарбаев).

            Жауап: Сіздің сұрағыңызға жауап беру үшін жалғыз Семей ядролық сынақ алаңын пайдаланудан қалған салдарларды еске салсақ та жеткілікті болар. Сол себептен Қазақстан төрағалығының “үлкен” тақырыптарының бірі болып жаппай-қырып жоятын қару-жарақтарын таратпау болуы мүмкін. Қазақстан әр кезде бұл халық­аралық жұмыстың бағытына, ядролық қару-жарақтан бас тартуға арналған іске күрделі тәжірибесі бар мемлекет ретінде басым назар аударады. Бұл мәселенің ерекше маңызын көрсету үшін отандық дипломатия Еуропадағы қауіпсіздік және ынтымақ­тастық ұйымының мінберін де пайдалауға ниетті екенін айта кеткен жөн.

            Сұрақ: Қазақстан, Орта Азия мемле­кеттері мен араб мемлекеттері арасында бірыңғай валюта енгізу керек пе? Бұл болашақта елдің сыртқы саясатында анықталған ба? Жалпы араб мемлекеттері мен Қазақстан арасындағы халықаралық қатынастар қандай деңгейде дамып жатыр? (Алмас Қайратұлы).

            Жауап: Ең алдымен сұрағыңыздың өзектілігін атап өткім келеді.

            Біріншіден, соңғы уақытта Қазақстан­ның араб мемлекеттерімен ынтымақтастығы нығаюда. Соның дәлелі ретінде елімізде араб инвесторларының қатысуымен бірталай үлкен жобалардың жүзеге асырылуы басталды.

            Екіншіден, Қазақстан дағдарыстан кей­інгі әлемдік экономика дамуының үлгісінде жаңа әлемдік және аймақтық валюталар енгізу идеясын алға тартып жүр. Осыған орай Парсы шығанағы мемлекеттерінің ортақ валюта енгізу ниеті назар аудартады. Осы бастама табысқа жеткен жағдайда бұл мемлекеттердің қаржылық мүмкіндіктері бойынша жаңа аймақтық валюта Қазақстан алтын-валюталық қорында өз орнын табады деп ойлаймыз.

            Мемлекетіміздің 2011 жылы Ислам Конференциясы Ұйымына төрағалық етуіне байланысты Орталық Азиядағы ауқымды инфрақұрылымдық жобаларға қаржылай қолдау көрсететін Ислам даму банкінің жұмысы ерекше назар аударады. Бұл банк­тің қаржылық ағымын есептеу құралының негізгі бірлігі – “ислам динары” болып табылатынын атап айту қажет. Ислам даму банкінің көптеген мүше мемлекеттерінің ірі қаржы қоры бар екенін ескерсек, Ислам Конфренциясы Ұйымының сарапшыларына осы ұйымның аясында мүше мемлекеттер валюталық-қаржы қатынастарында ислам динарын қолдануы туралы ойлануға болады.

            Сұрақ: 2010 жылы Еуропадағы қауіпсіздік және ынтымақтастық ұйымына біздің еліміз төрағалық етеді. Қазақ халқының мәдениетін танытатын Еуропа елдерінде қандай шаралар атқарылып жатыр? (Еділхан Алмасхан).

            Жауап: Төрағалық шеңберінде мемлекет тарапынан бірсыпыра шетелдерде қазақ мәдениеті күндерін және тағы да басқа шараларды өткізу жоспарлануда.

            Атап айтқанда, Австрия астанасы Венада үш концерт дайындалуда. 2010 жылғы 13 қантарда ЕҚЫҰ Тұрақты кеңесінің қо­рытындылары бойынша төрағалығымыздың басталуына орай Хофбург сарайының “Фест­­залында” (Festsaal) Қазақстан өнер ше­берлерінің концерті әзірленуде. Концерт­тік бағдарламаға қатысушылар құрамында Құрманғазы атындағы Қазақ мемлекеттік ұлт аспаптар академиялық оркестрі және К.Байсейітова атындағы Ұлттық опера және балет театрының симфониялық оркестрі, ба­лет труппасы, хор және жеке әншілері бар.

Екінші концертті жазғы айлардың бірінде өткізу жобаланып отыр және онда қазақ музыкасының жауһарларын, дәстүрлі орындау өнерін, еуропалық классикалық ән салу өнер жанрындағы жетістіктерді көрсету көзделген. Осы концертте Н.Тілендиев ат­ын­дағы “Отырар сазы” фольклорлық-этно­графиялық оркестрі мен жеке әншілер қатысады.

            Үшінші концертте Қазақстанның мәдени саналуандығын көрсететін түрлі жанрларды (ұлттық дәстүрлі, еуропалық классика, қазіргі заман эстрадасы) қоса көрсету ұсынысы қарастырылуда.

Сұрақ: Не себептен ЕҚЫҰ-ға төра­ғалыққа біздің елді таңдады? (авторы белгісіз).

Жауап: Бұл сұраққа жауап беру үшін төрағалық ету жай ғана мансап үшін берілетін нәрсе еместігін, керісінше, қомақ­ты жұмысты талап ететін қызмет деп білген жөн деп санаймын. Арасында дүние жүзінің ең дамыған демократиялары бар 55 мемлекеттің Қазақстанды осындай беделді қызметке бірауыздан сайлауы халқымызға, Елбасына деген үлкен сенімдері мен шынайы құрметінің көрінісі, әрі қол жеткізген жетістіктеріміздің мойындалуы ретінде қарастыруға толық негіз бар.

            ЕҚЫҰ-ны басқару үшін мемлекеттің екі артықшылығы болуы керек. Біріншіден, ол елдің халықаралық саясаттағы маңызды­лығы, екіншіден, мемлекетті басшыларының халықаралық қауіпсіздік ұйымында жетекші рөл атқаруға деген лайықты саяси ықтияры болуы керек. Қазақстан ірі ел екені, қазба байлықтары мол, соңғы 10-15 жылдың ішінде елеулі экономикалық дамуға қол жет­кізгені белгілі. Сондықтан, Қазақстанның геосаяси маңызы да ерекше мемлекет ретінде ЕҚЫҰ тарапынан келесі жылғы төрағалыққа таңдалды.

            Қазақстан әу бастан осы қызметке қол жеткізу арқылы, тарихы бай, беделі жоғары халықаралық ұйымның қызметіне заманауи жағымды өзгерістер енгізуге ниетті еді. Міне, ақырында қойған мақсатымыздың орындалуына да біршама жақындап үлгердік.

            Сонымен бірге Қазақстан Орталық Азия мемлекеттері арасында және ТМД аума­ғында әлеуметтік-экономикалық көрсет­кіштері бойынша, сондай-ақ жалпы қоғами дамудың барлық салаларында ұтқырлығы мен алдыға ұмтылғандығы Ұйымға мүше мемлекеттер тарапынан есепке алынды.

            Тағы да айтар болсақ, ЕҚЫҰ-ға 1992 жылдан бері мүше болған мерзім ішінде елі­міз осы құрылыммен оның барлық қызме­тінің саласы бойынша өзара қарым-қаты­настарды жоғары деңгейге жеткізді. БАҚ бостандығы мәселелері жөніндегі Өкілінің кеңсесі, ұлттық азшылық істер жөніндегі Жо­ғарғы Комиссар кеңсесі және Демокра­тия­лық институттар мен адам құқықтары жөніндегі Бюро тәрізді Ұйымның жеке құрылымдарымен сындарлы ынтымақтастық орнатып үлгерді. Сондықтан еуропалық серіктестеріміз төрағалыққа сайлау туралы шешім қабылдаған кезінде Қазақстанның Еуропадағы қауіпсіздік және ынтымақтас­тық ұйымымен орнатқан өзара тиімді қарым-қатынастар тарихын ескерді деуге толық негіз бар.

            Сұрақ: Қытайман тығыз қатынастар біздің тәуелсіздігімізге әсер етпей ме? Менің пікірімше, олармен өте сақ болу керек! (Берікбол Манатұлы).

Жауап: Қытай – бізбен іргелес жатқан әскери, саяси, экономикалық күші мол аса ірі мемлекет екені рас.

            Біріншіден, көршілес елдің Қазақстан мен Орталық Азия аймағының қауіпсіздігіне ықпалы орасан зор. Біз Қытай Халық Рес­публикасымен ортақ шекараның демарка­циясын (жер үстінде белгілеуін) өткізіп үлгердік, Шанхай ынтымақтастық ұйымы­ның аясында Қытаймен шекара ұзындығы бойы әскери салада сенімді арттыру және қарулы күштерді қысқарту жөнінде келісімдерге қол қойдық. Қазақстанның қауіпсіздігі, әсіресе жеріміздің тұтастығы үшін Қытаймен ынтымақтасып, әскери салада екі жақты сенімді арттыру өте маңызды деп санаймыз.

            Екіншіден, Қытайдың экономикасы жыл сайын қарқынды дамып келеді. Жаһандық қаржылық дағдарыс салдарынан көптеген елдердің, соның ішінде Батыстың алдыңғы қатарлы мемлекеттерінің, жалпы ішкі өнімі азаюда. Статистика мәліметтеріне сүйенсек, Қытайдың жалпы ішкі өнімі 2009 жылдың алғашқы тоғыз айында керісінше 7,7 пайызға өсті. 2009 жыл қорытындысы бойынша Қытайдың бұл көрсеткіші 9 пайызға жетеді деген болжам бар. Өсіп бара жатқан көршіміз Қазақстан кәсіпкерлері үшін үлкен нарық болап табылады. Мұндай мүмкіндіктерді пайдаланбауға болмайды.

            Сонымен қатар Қытаймен ынтымақтас­тық келесі бағыттардың дамуына ықпал етеді: а) экономикамыздың әр саласына шетел инвестицияларының келуі, ә) территориямыздың транзиттік мүмкіндігін арттыру, б) елге Қытайдың жаңа техноло­гияларын тарту, в) еліміздің мұнай мен газ құбырларын әртараптандыру, г) Қазақ­станның шикізат және өңделген өнімдер экспортын әрі қарай дамыту.

            Қазақстан егемен ел ретінде көпвек­тор­лы сыртқы саясатын ұлттық мүддесіне сай жүргізеді. Қазіргі таңда, ел қауіпсіздігін нығайтып, экономика, әлеуметтік, ғылыми-техникалық салаларды дамыту үшін Қазақстан Қытаймен ынтымақтасуға мүдделі деуге толық негіз бар.

Сұрақ: Қазақстан басқа елдердің одағына кірмей, өзіміз одаққа басшылық жасасақ қалай болады? Ертеңгі қауіп­сіз­дікті ойлау керек қой. (Абдулин Берікбол).

            Жауап: Қазіргі уақытта Қазақстан Рес­публикасы ешбір одаққа кірмей, тәуелсіз сыртқы саясат жүргізуде.

            Алайда Еуразия кеңістігіндегі мемле­кеттердің бүгінгі таңда көптеген аймақтық және жаһандық проблемалармен бірлесе айналысуына тура келіп отыр. Халықаралық лаңкестік, жаппай қырып-жою қаруларын тарату қаупі және есірткі тасымалы зама­нымыздың басты қатерлері болып табылады. Сондықтан, олардың алдын алу үшін бір­лесіп жасайтын іс-қимылды жандандыру мақ­сатында Қазақстан көптеген халық­ара­лық және аймақтық ұйымдарға мүше болды. Бұл құрылымдар арқылы біздің еліміз қауіпсіздік, экономика және қоршаған ортаны қорғау саласы мәселелерін басқа мемлекеттермен бірлесе отырып шешуде.

            Сонымен қатар бұл ұйымдарда Қазақ­стан жетекші орын алып отырғаны ақиқат. Еуропадағы қауіпсіздік және ынтымақ­тас­тық ұйымына және Ислам Конференциясы Ұйымына төрағалық етуіміз осыған дәлел болып табылады.

Тағы бір атап айтатын жәйт, Азиядағы өзара ықпалдастық және сенім шаралары жөніндегі кеңес (АӨСШК) сияқты едәуір беделге ие болып үлгерген халықаралық ұйым Қазақстан Республикасының баста­масымен құрылған. Онда Азия мемлекеттері арасындағы саяси көзқарастарындағы өзге­шеліктердің жанжалға соқтыруын бол­дырмау және өзара сенімділікті арттыруға бағыт­талған әскери-саяси, экономикалық, гума­нитарлық және басқа да салалар бойынша тиісті шаралар атқарылуда.

            Сұрақ: Ассалаумағалейкүм! Біз, яғни Қазақстан Республикасы, НАТО ұйымы мен Еуропа Одағына кіруіміз қажет деген ойға қалай қарайсыз? Егер біз осы ұйымдарға кірсек, қару-жарақ, ұшақ, тікұшақ, танкі, жалпы айтқанда соғыс құралдарын алу арзанға түседі және сапалы қару-жарақ алуға мүмкіндіктер молаяр еді. Мемлекетіміздің болашақтағы қауіпсіздігін ойлау керек қой! Егер де біз НАТО, Еуропа Одағына кірсек, Ресей мен Қазақстан арасындағы байланыс бұрынғысынша қала бере ме? Неге біз ядролық қаруды қолданудан бас тарттық? Егер үшінші дүниежүзілік соғыс басталса, әрине, бетін әрі қылсын, бірақ “Жаман айтпай жақсы жоқ” деген, басқа дамыған мемлекеттер “Ой, мынау ядролық қаруы істетпейді екен!” – деп қарап отырмайды ғой. Төбемізге бомба құлап келе жатқанда не істейміз? (Сократ Қарақытай).

Жауап: Белсенділік танытып, сұрақ қойғаныңызға рахмет! Сіздің үрейіңіз маған түсінікті, бірақ қазіргі таңда Қазақстанға сыртқы әскери қауіп төніп тұрған жоқ. Сондықтан бізге қарсы ядролық қару қолдану қаупі де жоқ.

            Еліміздің сындарлы сыртқы саясатының арқасында шекаралас мемлекеттердің барлығымен достық қатынастар орнатылған. Ал Қазақстанның жаппай қырып-жою қаруынан бас тартқанын әлем елдері әлі күнге дейін ерекше жоғары бағалап жүр. Оның бірден бір себебі 1949-1990 жылдар ара­лығында Семей ядролық сынақ айма­ғын­да 475 қару түрі жарылған. Соның сал­дарынан, кем дегенде үш облыстың (Шығыс Қазақстан, Қарағанды, Павлодар) тұрғын­дары өте ауыр және созылмалы сәулеленуге ұшырап, сынақ зардаптары осы уақытқа дейін жойылған жоқ.

Еуропалық Одақ пен НАТО ұйымына кіру туралы мәселе қазір Қазақстанның сыртқы саяси бағдарында тұрған жоқ.

            Сонымен қатар Еуропалық Одақ ел­дерімен ынтымақтастықты нығайту үшін Қазақстан 2009-2011 жылдарға арналған “Еуропаға жол” мемлекеттік бағдарламасын жүзеге асыруда. Бағдарламаның мақсаты – “Кәрі құрлықтың” дамыған елдерімен қа­рым-қатынастарымызды стратегиялық әріп­тестік деңгейіне шығару болып табылады.

            Қазіргі таңда Еуропалық Одақ еліміздің ең үлкен сыртқы сауда әріптесі болып табылады. Ал НАТО ұйымымен Қазақстан “Бейбітшілік үшін әріптестік” бағдарламасы аясында бірге жұмыс атқаруда. Аталмыш бағдарламаға қатысу Қазақстан үшін Орталық Азия аймағындағы қауіпсіздікті нығайту жөніндегі ерекше маңызға ие мәселе болып табылады.

Осыған қоса, Қазақстан Республикасы, өз кезегінде Орталық Азия мәселелерімен тікелей айналысқан бірқатар үкіметаралық ұйымдарға мүше. Атап айтсақ, Шанхай ын­тымақтастық ұйымы, Ұжымдық қауіп­сіз­дік туралы шарты ұйымы (ҰҚШҰ), АӨСШК.

            Білуімізше, еуразиялық кеңістіктегі се­ріктестерімізбен бірге ҰҚШҰ-ның бітім­гер­шілік әлеуетін әрі қарай дамытсақ, қазіргі заманға сай қауіп-қатерлермен күресудің әмбебап жүйесін қалыптастыруға қомақты үлесімізді қосуға мол мүмкіндік туындайды. Осыған орай, Орталық Азия аймағында өзекті қауіп-қатерлер жайлы ақпаратпен алмасу, сондай-ақ заңсыз көші-қонға және есірткі тасымалына қарсы бірлескен шараларды атқару сияқты бағыттарда ШЫҰ мен ҰҚШҰ тиімді жұмыс атқаруда.