ЖАҢАЛЫҚТАР

ҚР Сыртқы істер министрінің орынбасары Н.Ермекбаевтың Қытайға сапары туралы

            Қазақстан Республикасының Шанхай ынтымақтастық ұйымына төрағалығы шеңберінде, 2010 жылы 2-3 шілде күндері Пекин қаласында ҚР Сыртқы істер министрінің орынбасары Н.Ермекбаевтың ҚХР Сыртқы істер министрінің көмекшісі (орынбасар дәрежесінде) Чэн Гопинмен сыртқы істер министрліктері аралық консультациялары өтті.

            Консультациялар барысында тараптар Қазақстанның Ұйымға төрағалығына арналған ШЫҰ негізгі басымдықтары және Қазақстан бастамашысы болған көпжақты сипатқа ие және Ұйымның түрлі саладағы негізгі іс-шараларын айқындайтын ШЫҰ-ның 2010-2011 жылдарға арналған Іс-әрекеттер жоспарын талқылады.

            Келіссөздер қазақстандық тараптың Ұйымға мүше барлық мемлекеттермен өткізетін консультациялар циклінің жалғасы болып табылады. Бірінші кездесу ү.ж. 25-26 маусымда Мәскеу қаласында өтті. Ағымдағы жылдың шілде айында осындай консультациялар орта-азиялық әріптестермен – Қырғызстан, Тәжікстан және Өзбекстанмен өкізу жоспарланып отыр.

            Сонымен қатар, Нұрлан Ермекбаев ШЫҰ Бас хатшысы Мұратбек Иманалиевпен де кездесу өткізді. Кездесу барысында Қазақстанның ШЫҰ-ға төрағалығы кезіндегі Ұйымның қызметіне қатысты мәселелер және ШЫҰ құрылуының 10 жылдығына арналған 2011 жылы маусым айында Астана қаласында өткізілетін мерейтойлық саммитті өткізуге дайындық мәселелері талқыланды.

Жарияланған күні: 2010-07-03