ЖАҢАЛЫҚТАР

Қырғызстанды экономикалық оңалту бағдарламасы жөнінде

ЕҚЫҰ іс басындағы төрағасы, ҚР Мемлекеттік хатшысы – сыртқы істер министрі Қанат Саудабаев пен Қырғыз Республикасының Президенті Роза Отынбаева телефон арқылы сөйлесті. Тараптар ү.ж. 4 шілдесінде Ақордада өткен ҚР Президенті Н.Назарбаев пен Қырғызстан Президенті Р.Отынбаеваның кездесуінде қол жеткізілген келісімдерге сәйкес, Қырғызстанның экономикалық қайта жаңару бағдарламасын жүзеге асыру жөніндегі шараларды талқылады.

Р.Отынбаева Президент Н.Назарбаевтың тапсырмасымен ҚР Премьер-министрінің Бірінші орынбасары Ө.Шөкеевтің басшылық етуімен, құрамына тиісті министрліктер мен мекемелердің басшылары кірген жоғары деңгейдегі жұмыс тобының құрылуы жөніндегі ақпаратты ризашылығымен қабылдады. Р.Отынбаеваның мәлімдемесіне сәйкес, осындай жұмыс тобы Қырғыз тарапынан да құрылуда.

Тараптар құрылғын жұмыс топтарының мүмкіндігінше тез арада Ош пен Жалал-абадты қайта оңалту және Қырғызстанның экономикалық жағдайын жақсарту бойынша нақты іс-қимыл бағдарламасын анықтау мақсатында кеңес өткізу қажеттігін атап өтті.

Сонымен қатар, Қазақстан, ЕҚЫҰ төрағасы ретінде бұл мемлекетке инвестициялық портфель құру үшін және көмек тарту мақсатында Халықаралық донорлық конференция ұйымдастырмақ.

Жарияланған күні: 2010-07-10