ЖАҢАЛЫҚТАР

Қазақстан-Ауғанстан: ынтымақтастық даму үстінде

Бүгін Кабул конференциясы шеңберінде ЕҚЫҰ Іс басындағы төрағасы, Қазақстан Республикасының Мемлекеттік хатшысы – Сыртқы істер министрі Қанат Саудабаевтың Ауғанстан Президенті Хамид Карзаймен келіссөздері орын алды.

Кездесу барысында тараптар көпжақты және екіжақты форматтардағы ынтымақтастықтың маңызды мәселелерін талқылады.

Х.Карзай жақында Алматыда өткен ЕҚЫҰ сыртқы істер министрлерінің бейресми кездесуінің қорытындыларына, соның ішінде ағымдағы жылы Қазақстанда ЕҚЫҰ Саммитін өткізу жөнінде пәтуаға қол жеткізгеніне жоғары баға берді. Қазақстанның ЕҚЫҰ төрағалығындағы жұмсап отырған күш-жігерін және Президент Н.Назарбаевтың ЕҚЫҰ Саммитін өткізу жөнінде ұсынысын нақты қолдағандығын және алдағы уақытта да қолдайтындығын мәлімдей отырып, Х.Карзай осындай саммитке Қазақстан басшысының тарапынан шақыруын қуана қабылдайтындығын жеткізді.

Сондай-ақ, Ауғанстан Президенті Қазақстан Президентіне білім бері ынтымақтастығы бағдарламасына бастау беріп, сол бойынша ағымдағы жылдан бастап ауғандық 200 студенттен құралған бірінші топ Қазақстандық жоғары оқу орындары мен орта арнайы мекемелерінде оқуын батсауға мүмкіндік алғаны үшін алғысын білдірді. Жалпы Қазақстан тарапынан 50 млн. Доллар көлемінде қаржыландырылып отырған бұл бағдарлама аясында біздің елде 1000 ауғандық студент білім алатын болады.

Одан кейін әңгімелесуші тараптар екіжақты сауда-экономикалық ынтымақтастықтың дамуын талқылады. Бүгінгі конференция барысында аталғандай 3 триллион долларға бағаланып отырған Ауғанстанның үлкен табиғи ресурстар қоры мен Қазақстанның ресурстарды қазып шығару тәжірибесі өзара тиімді ынтымақтастыққа алғышарт бола алады. Х.Карзай Ауғанстан Қазақстанмен тығыз қарым-қатынасқа мүдделі екендігін және Қазақстанның халықаралық аренадағы қызметіне ары қарай қолдау көрсете беретіндігін атап өтті.

Осыған дейін, ағымдағы жылы Кабулда Қазақстанның Сауда-өндірістік палатасының өкілдігі ашылған болатын.

Жарияланған күні: 2010-07-20