«Қазақстан: Тәуелсіздіктің 20 жылы - ядролық қарусыз әлем құру жолында»

тақырыбына Вена қаласындағы БҰҰ офисіндегі фотокөрме

Ү.ж. 20 желтоқсанда Вена қаласындағы БҰҰ халықаралық орталығында "Қазақстан: Тәуелсіздіктің 20 жылы - ядролық қарусыз әлем құру жолында" тақырыбына арналған фотокөрменің тұсау кесері болып өтті. Іс-шара Қазақстанның Тәуелсіздігінің 20-жылдығына орайластырылып, оның ядролық қарусыз әлем құру шеңберінде атқарған қызметіне арналды.

Фотокөрменің ашылу салтанатына Атом энергиясы халықаралық агенттігінің және Ядролық сынақтарға жаппай тыйым салу туралы шарт ұйымының басшылары, Вена қаласында тіркелген дипломатиялық корпус өкілдері қатысты.

Іс-шара барысында баяндамалар жасаған қатысушылар 1949 - 1989 жылдар аралығында 500-ге жуық әуе, жер беті және жерасты сынақтары өткізілген Семей сынақ алаңының жабылуының маңыздылығы атап өтті. Баяндамашылардың бағасы бойынша Қазақстан және оның Президенті Нұрсұлтан Әбішұлы Назарбаев таратпау және ядролық қарудан азат әлем идеясы саласында мойындалған халықаралық лидерлер болып табылады. Оның айғағы ретінде, Орталық Азияда ядролық қарудан азат аймақ құру, БҰҰ Бас Ассамблеясының 29 тамызды "Халықаралық ядролық сынақтарға қарсы әрекет күні" деп жариялау туралы ұсынысты қабыл алуы сияқты қазақстандық соңғы бастамашылықтарды айтуға болады. 

Көрме экспозициясының бір бөлімі ү.ж. қазан айында Астана, Семей және Курчатов қалаларында АЭХА Бас директоры Ю. Амано мен ЯСЖТШҰ  Атқарушы хатшысы Т. Тоттың қатысуымен болып өткен "Ядросыз әлем үшін" Форумы жұмысына арналған.

Қазақстанның аймақтарындағы сынақтардан зардап шеккен балалар салған суреттер мен тәуелсіз 20-жыл ішінде еліміздің жетістіктерін паш ететін фотоматериалдарға көпшілік  ерекше қызығушылық танытты.

Жарияланған күні: 2011-12-20